Novos fondos gráficos do Concello de Pontevedra incorporados a Atopo
O Servizo de Patrimonio Documental e Bibliográfico da Deputación acaba de incorporar ao metabuscador Atopo un conxunto de 112 fotografías procedentes dos fondos gráficos do Concello de Pontevedra.
A catalogación e dixitalización deste conxunto, solicitadas desde o Arquivo municipal, continúa e complementa os traballos desenvolvidos en 2022, cando o servizo incorporou máis de 75.000 documentos e imaxes históricas a Atopo.
Estas fotografías corresponden na súa totalidade á década de 1980 e ao mandato do alcalde Xosé Rivas Fontán. Trátase de imaxes de temática variada: actos e recepcións oficiais no Concello, obras públicas en diferentes puntos do centro urbano e das parroquias, competicións deportivas, actos das Festas da Peregrina ou da festividade de San Sebastián etc.
Con esta incorporación, integran o fondo gráfico do Concello de Pontevedra un total de 2.723 imaxes, das que case o 90 % se poden descargar a través do portal da Deputación.
Este proxecto, desenvolvido polo persoal técnico deste servizo, supón outro paso adiante na posta en valor do patrimonio documental dos concellos da provincia.