Servicio de patrimonio documental e bibliográfico - Deputación de Pontevedra

Estes fondos sitúanse na propia casa do concello, unha edificación á que se trasladaron as dependencias e os servizos municipais no ano 2001, entre eles o arquivo municipal, que antes se atopaba no baixo cuberta da antiga sede municipal.

Esta moderna edificación desenvólvese horizontalmente, con abundantes vans e cunha distribución en baixo e planta. Na zona central rómpese a composición verticalmente, cunha elevación do teito e cunha ampla balconada.

O arquivo sitúase na planta baixa, a carón das oficinas e do salón de sesións, nun espazo rectangular de 58 m², conectada a través dunha escaleira interior con outro espazo da planta superior, concibido inicialmente como zona de traballo e consulta, e no que en 2018 se colocaron estantes para depositar a última transferencia de documentación. Ademais, anexo ao arquivo hai un espazo destinado ao almacenamento de publicacións, boletíns, impresos e outros materiais.

O local conta con todas as condicións de habitabilidade, ventilación, limpeza, control ambiental e iluminación necesarias para conservar a documentación, e co equipamento necesario para o tratamento e a utilización dos fondos existentes, coma estantes metálicos, unha mesa de consulta e un ficheiro metálico.