Antón Sobral
Esta publicación é unha monografía completa sobre a pintura de Antón Sobral dos últimos quince anos da súa traxectoria artística. A escolla de traballos abrangue: Dende Portosín (1990), Néboa (1993), Montañas (1996), Dúas ondas (2000), Mar tormenta II (2002), Serie Océano Sobral (2006), De Noia a Arou (2008)… Percorrendo as imaxes do catálogo descubrimos a vida e obra do artista, os seus encontros con Hans Haacke, Robert Morris, Ana de Matos, Gerhard Mader, entre outros; a súa viaxe a Venecia, que lle inspiraría para unha das súas exposicións, e a súa paixón pola fotografía. «Desde que ten memoria como pintor, e iso sucede desde a primeira adolescencia, Antón Sobral, que é dunha vila mariñeira por antonomasia, Marín, asociou o mar á arte e ambos os dous conceptos son indisolubles na maneira de concibir a súa ollada estética: xamais deixou de pintar o mar, nin de o fotografar, nin de o sentir.» Este magnífico libro-catálogo contén textos de Rosa Aneiros, Rosa Bugallo, Fina Casalderrey, Yolanda Castaño, X. Antón Castro, María do Cebreiro, Pedro Fernández, Susana Fortes, Sara Jess, Seve Penelas, María Seage, Xaime Toxo e Ramón Rozas, específicos para esta edición. O deseño do libro é de Carmen Hermo e a cuberta un dos cadros do pintor.
