Legado musical del Maestro Augusto Bárcena, El
Augusto Bárcena Saracho naceu en Vigo en 1883, froito do matrimonio de Augusto Bárcena Franco e de María Saracho Spínola, condes de Casa Bárcena, título hereditario outorgado polo papa Pío X e que, na actualidade, lle dá nome a unha rúa na súa cidade natal. Seu tío Manuel Bárcena Franco obtivo de Alfonso XIII o título de conde de Torrecedeira. Foron os Bárcena Franco unha das familias de referencia dentro da alta sociedade daquel Vigo que, entre os últimos anos do século XIX e os primeiros do XX, iniciou o despegue industrial que o convertería na primeira cidade de Galicia. Propietarios de casas de banca e consignatarios de buques, tamén invertiron en industrias do ocio coma o Teatro Tamberlick ou en proxectos coma o tranvía entre Vigo e Baiona. Homes moi activos, polo demais, na política e en todo o que tiña que ver coa vida pública daquel momento. Augusto Bárcena Saracho realizou os seus estudos en Vigo, Madrid, onde se licenciou en Dereito, e Barcelona, onde estudou Comercio. En 1910 foi proposto para vicecónsul de Noruega en Vigo, país que tamén representara antes seu pai, o conde de Casa Bárcena. Musicalmente tamén se formou en Vigo con Mónico García de la Parra, director da Banda Municipal de Música de Vigo, e contou co maxisterio e amizade de recoñecidos músicos do seu tempo coma Ángel Rodulfo entre outros, pero foi en Barcelona onde se instala a partir de 1914 para dedicarse enteiramente á música ó entrar en contacto con Manuel Burgés, compositor barcelonés de gran prestixio e fundador da Escuela Musical Internacional de Barcelona e da Sociedad Barcelonesa de Conciertos. Algunhas das súas creacións chegaron a ser altamente populares no seu tempo entre as que destacan as súas obras con textos en galego ou de temática do país.
