Servicio de patrimonio documental e bibliográfico - Deputación de Pontevedra

Debido á escaseza de espazo para as dependencias e os servizos municipais da antiga tenencia da Alcaldía, construíuse unha nova casa do concello para dispoñer dun espazo digno e suficiente.

Esta moderna e austera construción, obra do arquitecto Manuel Gallego Jorreto, inaugurouse en xaneiro de 2004. Concíbese como un gran bloque cadrado de pedra, con escasos vans, distribuído en baixo e dúas plantas.

O arquivo municipal disponse na segunda planta e é accesible desde unha sala multiusos e a carón dos despachos dos diferentes grupos políticos. Trátase dunha sala rectangular, que conta cunhas axeitadas condicións de habitabilidade, cun ficheiro, cunha mesa de consulta e co equipamento suficiente, entre os que se inclúen máis de 120 m de estantes compactados para albergar os fondos documentais.