Servicio de patrimonio documental e bibliográfico - Deputación de Pontevedra

Estes fondos sitúanse na propia casa do concello, unha edificación tradicional de pedra, de considerables dimensións, con baixo e planta, e situada a carón do río Umia e da estrada N-550, da Coruña a Tui.

Tras a última reforma, na que se tentou resolver a medio prazo o problema de espazo que se arrastraba, a zona dedicada ao arquivo municipal ocupa a parte posterior do claustro central do edificio, distribuído en catro salas que rodean a pequena capela existente. Son algo máis de 85 m² en total, con ventilación e iluminación natural suficientes. Nestes locais instaláronse estantes metálicos para albergar toda a documentación conservada e tamén deshumidificadores para regular a humidade ambiental.

Ademais, un dos locais conta cunha mesa de consulta e de traballo, cun ordenador e cun ficheiro metálico para os instrumentos de descrición.